"Стыль і гармонія” на Загрэблі

Упраўленне фізічнай культуры, спорту і турызму Мінскага абласнога выканаўчага камітэта падвяло вынікі конкурсу "Лепшая аграсядзіба Мінскай вобласці 2012 года”. У намінацыі "Стыль і гармонія” лаўрэатам конкурсу стала аграсядзіба з Уздзеншчыны – "У Бондара на Загрэблі”, якая размешчана ў маляўнічай лашанскай мясцовасці. Грамату ўпраўлення фізічнай культуры, спорту і турызму, а таксама памятны падарунак гаспадару аграсядзібы Валерыю Віктаравічу Бондару ўручыў начальнік райаддзела фізічнай культуры, спорту і турызму Віктар Пятровіч Юркевіч.

Гэты аб’ект аграэкатурызму функцыянуе ўсяго толькі год, і ў падобных конкурсах удзельнічаў упершыню. Мы пацікавіліся ў Валерыя Бондара, што падахвоціла яго прыняць удзел у конкурсе.

– Я чалавек азартны, заўсёды цікавіўся рознымі конкурсамі, таму калі даведаўся пра гэты, то падумаў, а чаму б і мне не паўдзельнічаць, – прызнаецца Валерый Віктаравіч. – Тым больш, што мая аграсядзіба выдзяляецца сярод іншых сваёй самабытнасцю, што і пацвердзіў конкурс.

Спыняцца на дасягнутым гаспадар сядзібы не думае. У яго ёсць яшчэ некалькі цікавых задум, якія патрабуюць дапрацоўкі, каб іх пасля змаглі належным чынам ацаніць аматары адпачынку на прыродзе.

І хоць гарачы летні сезон ужо завяршыўся, лашанская аграсядзіба не застаецца без наведвальнікаў. Не за гарамі калядныя святы – значыць, і надалей тут будзе панаваць пах бярозавага веніка, шашлыку і святочнасці…

НА ЗДЫМКАХ: грамату Валерыю БОНДАРУ ўручыў начальнік аддзела фізічнай культуры, спорту і турызму Віктар ЮРКЕВІЧ; зачараванне аграсядзібай.

Вера ЛУКАШЭВІЧ.