Напачатку сёлетняй восені, 12 верасня адбыўся першы мастацкі плэнер, прысвечаны памяці класіка беларускага мастацтва ХХ ст. Міхася Сеўрука.
Мінскія мастакі Фёдар Ладуцька і Яўген Шунейка, іх калегі з Узды Андрэй Лычкоўскі і Алесь Філіповіч, а таксама мастачка з Гродна Алена Шунейка наведалі старадаўні Нясвіж і правялі шмат гадзін у доме-музеі мастака, размясціліся з эцюднікамі вакол утульнага будынка.
Малявалі алейнымі, акварэльнымі і пастэльнымі фарбамі пакойчыкі з экспанаванымі там творамі і асабістымі мастацкімі прыладамі вялікага творцы, адлюстроўвалі фасад музея і дворык з яблынямі.
Гэта тая творчая прастора, у якой былі створаны шматлікія жывапісныя і графічныя кампазіцыі М.Сеўрука. Вельмі часта гэты дом з дворыкам станавіўся аб’ектам пранікнёнага жывапісу нясвіжскага маэстра.
І вось, нарэшце, упершыню ў сучасным беларускім мастацтве з’явіліся энтузіясты, якія знайшлі час і наведалі мемарыяльнае месца, дзе было створана цэлая галерэя народных вобразаў, партрэтных выяў, пейзажных і сюжэтных твораў, маляўнічых нацюрмортаў і інш.
У выдатна захаваным гістарычным асяроддзі, як адзначылі ўсе ўдзельнікі плэнера, малявалася лёгка і натхнёна, бо дапамагала і сама атмасфера дома мастака, сваечасова пераўтворанага ў музей.
Перад ад’ездам удзельнікі плэнеру зрабілі яшчэ шэраг эцюдаў на беразе возера, якое надае непаўторную прыгажосць гарадскому цэнтру, дзе таксама раней бываў М.Сеўрук з пэндзалем і палітрай.
Праз тыдзень мастакі працягнуць сваю працу на нясвіжскім плэнеры, а затым падрыхтуюць выставу ў Нясвіжы, многія творы з якой будуць падараваныя раённаму гісторыка-краязнаўчаму музею.
Яўген Шунейка,
кандыдат мастацтвазнаўства,
прафесар Беларускай дзяржаўнай акадэміі мастацтваў, член Беларускага саюза
мастакоў.
Напачатку сёлетняй восені, 12 верасня адбыўся першы мастацкі плэнер, прысвечаны памяці класіка беларускага мастацтва ХХ ст. Міхася Сеўрука. 
